DISTINU DI TRABADJADOR

//
//
Salariu di fomi
Orariu di lumi
Orizonti di omi
//
Orariu di fogu
Orizonti di kuku
Salariu di sufoku
//
Orizonti di karbon
Salariu di kontestason
Orariu di rezignason
//
Salariu di kunha
Orariu di unha
Orizonti di munha
//
Orariu di barau
Orizonti di kau
Salariu di travau
//
Orizonti endividadu
Salariu injustisadu
Orariu dislokadu
//
Salariu minimu
Orariu maximu
Orizonti prosimu
//
Orariu di padrinhu
Orizonti rizonhu
Salariu di sonhu
//
//
Olisanto 07072008

MAR(A)TONA D JOG LINP

Dispois d un not na farra d 18 aniversariu d nha neta Debux i d alguns milha d nha 55 on, konpletadu 19 d Agost, na pasod dia 29 d Agost d 2008, pa 5 ora d plumanhan, N pasa nha muxila d tropa na kosta, txeu d djorlas (Aga d Ponta Pretu, material d primer sekor, rason d kunbat i ots kuza), N dispara, mi so ma Deus, pa Santa Maria, a pes, na kunpriment d segundu fazi d Maratona di Jogu Linpu, inisiod na Saniklau (Bila / Praia Branka), 41 anu pasadu. Pa kunplita es aventura, falto-m ainda faze Kanalinh Jilod / Baia das Gatas na Sonsent i Port d Sal-Rei / Kabesa d Taraf na Bubista. Ki tal, Snhor Ministru d Disport, SiDoMo...?!
Na vespa, dpos d N faze un Test Anti-Doping na “Ospital Bedj” d Djasal, N uza d nha Statut d Ofisial Militar reformod (B.O. Nº 3 d 21 d Janer d 2002), N da un “aramada” pa Komandant Militar Auzent na Praia Maria tud mes, na kakusta d “RFA”, pa un boka-boka ku Txifon Militar – Jeneral Bingala d 5 Tanbarina, autu-exkluid d Dekretu-Lei 53 d 27 d Dezenbru d 2000, ta pdi-l prutesãu ku siguransa na TAF/PAF.

D nha Barraka d Luxe na Forsaerea (FA) te Murdera N kaminha na marxa lentu i dali te Santa Maria na kurrida lentu, ku interval d 5/10 min pa panha/ganha folg.

Durant tud perkursu, N sigi na kontra-mon, ta dzafia Animais Firoz inpurtod (korr d marka d RIKUS D DIMOKRASIA) des Pais d Palos d Papilon ki un dia sunha na “Liberdad, Igualdad i Fraternidad” d Jean Jacques Rousseau.

Mal N pasa rutunda d Madama (Kaza d Prezident!), N kei nun INBUSKADA d turistas d azagua (Muskitus) k taba ta spiro-m na Tapada d Laps i Familia, na mei d Akasias Mirkon. Nha sort k ainda N taba dentr d alkons d fog d Destakament Militar d Madama, xefiod pa Sarjent KePe, k log faze-m 5 min d fog kunsentrod d murter i manda un skuadra d PM (Pega Mata) muntod na BRDM-2, iquipod d Bazuka (lansa fuget RPG-7), Ametralhadora PeKa i AKM- 47, granada F-1, pa abri-m un kurridor d pasaja k N kuntinua viaja senpre vijiod pa PM na area na misãu d sidadania - protesãu d ta(r)taruga i vijilansia d dzenbark d klandistin na kosta (Murdera / Praia Fragata). Pa kes muskitu mas fastent / teimoz, N electraliga nha lek pa fujenta-s. Set i trinta, ora markod, N kruza META na Otel Novorizont, Santa Maria. Mal N pta ferr, Sarjent Kepe faze-m sabe k el tinha dod un txuba d purrada (kurretiv na jiria militar) pa arranka verdad d boka d prizioners k kaba pa kunfisa mo un kunpanher meu, k dizisti na ultima d ora, pasa-s (binde) nha Plon d Mar(a)tonista, pa un furtuna.

Kuidod “A NAÇÃO”! Sr. Bestanariu di dijulgadus ka pude sabe des metudu kastrenz di “TROPA D ELITI” Braziler, pa el ka ten ki ba distribui-l pa tud Juiz Militanti d Inkurpurason (JMI), antis d nha julgamentu d datoramentu na Atletismu d Sgundu Idadi!

Posu Verd, “Djasal 200 On d Storia”, 18 d Stenbr d 2008.

Djasalenz Olisanto (Maratonistanatu!)

KU ALUPEC

KU ALUPEC (KADA GOTA TA KONTA) Na Anu 10 d ALUPEC (Alfabetu Unifikadu pa Skrita di Kabuverdianu) N da volta mundu, montadu na jurnal d papel “A Nação” ku Kronikas d Sidadania, ta divulga Lingua maternu skrebedu na varianti di Bubista i di Santiagu, kamuflod/tinpirod ku variant d Djasal, Patxiparloa i Sanvisent, pa da-l un sabor d djagasida fugens. Tanbe N nuta mo sertus Orgãu d Komunikasãu Social Kabuverdianu ten fet mut pok na divulgasãu, valorizasãu i promusãu d kriol skrit. Kontinensia pa “A Nação” i “Liberal Online”! Poku divulgod pa organismus d Stadu i pa jurnais d papel (sima “A Semana” i “Expresso das Ilhas”), “A Nasãu”, na se Linha Iditorial d primer nunbre, kunpromite sta na vanguarda d divulgasãu d ALUPEC i d inkurajamentu d inisiativas d intuziatas d skrita kriolu. Pena mo kes otu jurnal inda ka intende inpurtansia d ses papel nes luta pa dignifikasãu d kriol skritu. Txeu artigu mort, pur asfiksia, na gaveta d Diretoris des Jurnais, en benifisiu d artigus na língua di tuga kerrigod d gerrildja pulitiku, na disputa d tirritoriu. En difeza d ALUPEC, kada gota ta kunta! N sta pinsa seriament en mite un kexa na AJOC i na Alta Intidad pa Kumunikasãu Sosial (AIPKS) kontra determinadus jurnal d papel. Tanbe N sta pinsa mite un kexa i na Tribunal Kunstitusional (TK) kontra Instituisons (publiku i privod) pur diskriminason di kartas, en kriol, d Sidadãus, ku ses inpostu likidod na boka kofr. Senhoris Pulitiku (partikularmenti, Diputadus Nasional), kze bzot sta faze pa intrudusãu d ALUPEC na insinu? Apezar d tud k “A Nação” ten fet inda no ta repara deskonhesimentu kuaz jeneralizod d ALUPEC. Kond snhors pulitiku des nos Dimokrasia Multigatu kre saduzi povu pa ganha mas uns vutinh es ta bonburdio-n d kriol falod. Ma, na ora d dfende kriol skrit, es ta refujia na Bunker d Par(a)lamentu ta ratxa lingua d tuga, sen pena d Kamonx. N ta pregunta-s kal des ki ten mas personalidadi ki antigu Diputadu Tvarela o ki atual Diputadu Kaka Barboza? Nos lingua ten personalidad! El ten puezia i tud kes ot kundimentu (kuza) ki ten Purtuges, Spanhol, Franses o Ingles! Dexa di mania, bo da bu fidj/netu privilejiu d skribe kurretament (ALUPEC) na se lingua maternu. Pa isu, so bu ten d faze un koza Snhor Politiku/Diputadu: institui ALUPEC na skola inda es anu lektivu! Kundisons pa ofisializasãu d ALUPEC – Arma indispensavel pa no spresa kel ki ta ben na alma – dja ten! Ka ta da pa spira: na mes d Dezenbru des on d 2008, Ministeriu di Kultura sta urganiza un Kongresu ku Sientistas di Kriolu pa faze balansu d fazi d Sprimentasãu d ALUPEC i pa furmaliza un Ultimatu na AN (Asenbleia Nasional) ta eziji plenu Ofisializon d lingua maternu kabuverdianu, onbru onbru k purtuges, sima nº 2 di Artigu 9º d Kunstituison ta manda. N ta spira k sinhor Zizim “Pex-Spinh” ta sta prezent, k e pa-l vinde se “Bif d Kaneka” (kabala Frit, Barãu i Xa d mot) pa krakis di Lingua di Bersu – Lingua Primeru pa UNESCO. Tud jurnal (d papel i iletroniku), revista, Ajensia Publisitariu i skola sta konvidod a partisipa nes kanpanha d divulgason i promusãu d Kongresu d ALUPEC! Kada gota ta konta! Sal, Forsaerea, 23 d Agostu d 2008. Olisantu Kabreru (00016175)

KARTABERTU PA BAILADU BABOZA AMADU (9)

Kartaberta pa Bailadu Baboza Armadu
Karu amigu i kamarada d' armas!

Nhas mantenha i parabens pa bu nobu kargu di Diretor Jeneral di Suguransa - SA di Sidadi-Stadu di Republika di Kabu Verdi, ku pe na selerador “Vitoria e Sertu!”

Pa bu liba es bu sonhu di anu 1975 (tenpu ki bu era akuzadu di Sunita Torstiska), bu sulisita bu “amigu di petu”, Entra Somat Nelinista i alguns mersenariu pa djuda-bu na kunbati kontra Bruxas organizod: Tangas-Star, Thugs, Katanas, fakas, bokas-bedje, Txeias, Kurrupisãu, fogu inpostu, palasius klandistinu, roubus i furtus, ... ki dimokratikamenti i na liberdadi, dia i noti, ta pasia pa tudu kutelu, sen opuzison di Electra.

Amigu e pa es okazions! ”Spasiba” pa bu linbransa. Pa algun kuza nos dois sta djuntinhu na “Cabo Verde Os Bastidores da Independência” di JVL.

Di kurason, N ta gustaba d' ser bu Kabu-Matu, ma gosi, dipos d' N ter kolaburod na formason di Guvernu de Salvasãu Nasional, N sta okupadu na selesiona Guvernadoris di Fregezia (Klientela!) ki pa mite sertus PKM na ordi, i N sta inda na djuda Zema aranja soluson pa traze kel pitrol di mar di kosta di Bubista pa tera, pa tapa (kala) Opuzison konvensidu boka. N sta inportanti - Konselher Popular di JMN! “Tavarixi?”

Po N ka falta Zema nes krizi glubal di boa guvernason, N ta pidi-bu pa djuda-m asalta fraudulentamenti banku di soluson pa tudu d' kel snhor d' kapital d' pais. Otu kuza: falo-m kes genti di Tevekaria mo omi matxu i xefi di tropa, keridu i rispetadu, na Frenti di Konbati ten ki ser personaji prinsipadu. N ka ta gustaba djuda-bu na bu primeru aprezentason publiku na papel di terseru.

Bu pode konta ku nha Komite di Asosoria pa kargus polidu. Pa fasilidadi di nos kontatu ja N monta un radar na Murinhu d' Karvon po N sigi-bu tud bus pose. Kuidad mo es amig Xiita Mau(v)ista sa ta ser prukuradu pa Orden Davogadus, akuzadu di spekulason di presu di pitrol.

Na mon di Diputadus Multigatu sta un pididu di alterason, made in Kabu-Verdi, di inkonstitusionalidadi, pa permiti nha stradison pa Kanpu di Serra di Ildja Fantastiku di GA, difensor ferrenhu di sentera.

Komu jurnal ka di nos, so mas un kunsedju: Papia kriol na bus kunferensa di prensa!

Konpanheru di luta pa Independensia!

Otel Belorizonti, Santa Maria, Djasal, 02 di Julhu di 2008
Antoniu Santiagu Oliveira - Olisanto(u)
CapAM (Ref) 00016175
Tel: (238)2411827; Mov: 9937349
Email: oliversan3@hotmail.com

"I AGORA PAICV?"

Na pasod dia 29 d Moi,na Utel Kriola,bila turistiku d Santa Maria,na Djasal,PAICV da un jantar pa kandidatus i ativistas k tma part na kanpanha ileitural.
Zema,Bazil,Skapa i Preirona (tanbe prezents nes jantar) fka txeu kumuvid d udja brildj d vida na rost d kada tanbarina.
Muranginh i komandant en xef,JMN,faze un diskurs(txeu bes interrunpid ku viva ZMaria , viva PAICV i viva Kab Verd) d agradesiment pa morabeza,solidariedad,fidelidad i lealdad pa partid.
Nes diskurs,Murgadinh pdi unidad na luta sen tregua na opozisau a kanbra d GIMS.
Uns pesa bodj,abros i txeu bej akunpanha-l pa Lagua.Mi N kuntinta kun ratrot ma Retaguarda.Forsa Zema!

I agora PAICV ?
Sima nha amig i kamarada Piry fla :”verga ma ka ta kibra”.
PAICV e un partid ku storia d luta ki ka ta murre kun bataldja perdid.
Na 2011,ku Kab Verd na kurason,pa surpreza d tud santus,kontra tud fenomenu stronh, no ta inkuntra na tapadinha.
Na lingua d terra-variant d Bubista.Un kunbatent anonimu d skerda mudernu!




Antoniu Santiagu Oliveira - Olisanto(u)
CapAM(Ref)00016175
“Forsa Aerea” Sporg Dja Sal
CP 63
Tel:(238)2411827;Mov:9937349
Email:oliversan3@hotmail.com


.-‏

KARTA PA JURNAL PAPEL

Snhor Diretor d' Jurnal A Nação!

Pergunto-m Snhora di Distribuison gze sta pasa, dja ten dos smana sen jurnal na balkon di Shell i di Bom Dia na Djasal,dondi normalmenti N ta kunpra jurnal.

Ka flo-m mo Sr Kumandant “Kalbar” dja invuka (in)seguransa pa prinde A Nasau na Praia.
Sendu asin, el teni razon!A Nasau e mas prigoz kes Boka-Bedj d Guarda-Spald d Sr.PM.Txakota!.

Dez bez,Sr.Kumandant ka miste “Orden dus Kumandant” pa difende-l na TV.
Sr. d ”Praia teni soluson” ku se ekip di (In)sindikansia (in)dependent ta rezulbe es i tudu virus di Filu.
Kuidadu,amigu virador Sr.Bailadu,pa Sr.Sulis Kroreia i Vasil ka truka-bu pa es iluminodu “Spert di Siguransa” di skola di KGB.

Te la, Sr.Diretor,faze favor, tuma Spres Kabu Vint pa po-n A Nasau na loja.
Enbora sendu kumandanti militar na reforma, inda N sta linbrodu di alguns propriedadi teknu i tatiku des AEM ki ta txomadu A Nasau,k kond ikipadu ku Bonba di Fragmentason Lingu Maternu (BFLM) e un prigu pa kalker Ezersitu di umanidad.

Karetaristuku:

Transportador - B-2
Raiu di ason - 5000Km
Onda di xoku -Vulkan di Fogu
Tenpu dun lansamentu a ot – 8 dia
Plataforma di lansamentu na Djisal-Shell,Bon Dia,Bar/Restauranti di ASA


Sr.Diretor, kuidodu pa buse ka ba para na TPI pa krimi di gera!
Buse sabia kes Tribunal dja pidi nha kabesa? N sta ta ser konsidiradu un prigu pa Umanidad,
akuzodu di pa Bonba(ALUPEC) na Jurnal A Nason!Uns dos bez Av.di SIA dja skala Djasal pa ben buska es Turista di luta pa inplamentason di Lingu Maternu na Kab Verd.
Guantanamu sta ku porta abertu pa resibe-m.Kel diretor sta priokupadu pa mo N faze tropa na Kuba,unde ki N kunxe terrunu dretu.N foi un guapi di Guantanamu na invazon di marinus di Merka na Granada.
Pa u k for,Kom for i pa ond for,Kumandant en Xefe ordene!Asi gno (militar o sivil) taba atende telefone o radiu.

Sr.Diretor,pur favor, ka publika es karta po-m ka ser inkuntrod.N ta sob skuta!

Fika atentu...Senha-Nateliza.Kontra-Senha-OLISANTO!

Te ................


Kutelu d Burakana,Djasal,20 di Junhu di 2008



Antoniu Santiagu Oliveira-Olisantu
CP Nº 63
Forsa Aerea-Spargus
Jdasal-Kabu Verd
Tel.2411827
Telele:9937349
Email:oliversan3@hotmail.com

KARTABERTU I PA SR. PKM-SAL

Sal, 25 Abril 2008

Exmos. Srs. Prezident da Kâmara Munisipal du Sal
y u Sr.Delegadu da Electra du Sal

C/C
Diretor Geral da Electra
Kandidatu du GIMS Pa PKS
Kandidatu du PAICV pa PKS
Kumisao ileitural du Sal
Radia Nasinal studiu d Sal
Jurnal a Nasão

Asuntu: Kartaberta konstitusionalment permitid

Esmos.Senhores,

N sta faze es karta so pa pergunta buses pa mo k na nha zona(zona d ningen-ver plaka fin lokalidad)-

Bairru d Forsaerea y ses 36 almas ka kontenplod na lus, bzot manda po frent kuartel.N ta spira ka ten

nada aver ku mumentu spesial gno ta vivé na país.Mas linguas dja flâ kes trabodj e pa favorase kandidat

d puder na kuartel k ten fama dser du pai.Má N ta pergunta si nos (36 almas)ka fidj d Deus!

Tud jent sabê gmi e PAICV y apoiant d SCAPA Y Muren.Pa mo min, nhas fidj nen ningen d bairru ka pude

paga pa nhas pikod-Ser PAICV y apuiant d SCAPA.Desd bzot kunpsa kel trabodj nen lus nen agu.Skluin d

Spargus tud sert!má privon dlus ma aga ja pikod a mas!N ka pudé fkâ kalôd kes diskriminasão!

N ta stranhâ dinpinhament diletra,k senpre anda ta durmi! Meia!?...

Min e un salense,kontribuint (NIF nº 127947248)kupridor nhas deveres.Pur isu,N tu txa nos divé ser

kuntenplod nes ben d tud munísip ta dzija.

Aus kandidatus,kel ganha ,lembra gno ta ezisti!

Viva 25 d`Abril

Sen ot asuntu d mument subskrevemus kon us melhores kunprimentus.

Atentament,

António Santiago Oliveira(Studant d`ALUPEC/ALUPEK)

B.I.00016175
TM:9937349

KRONIKA DI OLISANTO

(ON 10 D ALUPEC)


Na Lingua di Tera, N sa ta ben kronika aventura di un Grupu di Skursionistas rezidenti, ligadu a Industria Oteleiru, altamenti ekipadu ku Armamentu Nãu Kunvensional, ki rezolve apruveita FERIAS di Kabala Pretu, Radiu Rejions i di Diputadus ku ajudas di kustu aumentadu en plenu KRIZI di pitrol i di seriais (KAU MAU!), pa sugundu anu konsekutivu, mite na meiu di un sol di ratxa kosta, na pasod dia 2 (dois) d Agost, pa un Volta Ilha (skurson) ku MISÃU di:
1- Rikolhe Subsidius pa aprezenta na reuniãu di Konsertasãu Sosial sobri “SALARIU MINIMU” na Industria Oteleiru, previstu pa dipos di OLINPIADA di Xina di “Nos Lider” Mau Dze Tud;
2- Observa i anota tudu konstruson a menus di 200 metru di orla maritimu;
3- Observa i anuta izistensia di inimigus (LIXU) dezenbarkod na praia;
4- Informa Mandu Superior, via radiu, di movimentasãu d otus skursionista nasional i stranjeru na aria;
5- Apunta praias ku banhistas o piskadors kriol, pa analizi statistiku di pubreza;
6- Analiza si posas d agu (pis-sinas) ka tene ovus di muskitu di paludismu;
7- Kazus d imerjensias o afugamentus pa utiliza ekipa d Nadadors/Salvadors.

Di vespra, Snhora Prezidenta, MM, txuma-nu na si Skritor pa resibe, sklarese i puntualiza Mison na mapa:

PRUGRAMA:
Pont d Partida/Linha d Konbat - Otel Novorizonte -10 Ora;
Pont d Diskansu pa refeisãu friu i kent (udja mapa);
Pont pa Reuniãu Balansu - Praia d Santa Maria (17 Ora);
Regres pa Baz na Spargus -18 Ora i 30 minut.

FORMASÃU D KULUNA:
19 Skursionista i 6 Korr Blindod;
Patrulia d Splorason/Sapador - 1BRDM-2;
Xefetura -1T-54;
Pelotãu d Xok – 1 UNIMOG;
Abastesimentu – 1 MAN;
Post Mediku -1 UAZ;
Manutensãu -1 MTO;
Distansia entr korr 50 metru;
Velusidad d Marxa – 4-5km/ora.

Ora+H, no abri na txada, muntod na Burrus Anfibiu. Pa prokura kunpri Mison na ora previstu, no apruveita karekteristikas di terrenu i sigi es itinerariu: Otel Novorizonte, Salinas, Serra Negra, Djeu d Xanu, Rif d Parda, Salinas d Pedra d Lume, Burakana, Rigona, Funtona, Ponta d Rif, Algudueiru, Praia d Santa Maria.

Paraja pa diskansu (ripo inerjia):
- Serra Negra - Refeison kenti i fotografias d naturaza umanu i divinu;
- Boka d Arbera d Taraf – Banhu i Fotografias d tud manera;
- Rif d Parda - fotografa mangatxada d tubaron -“Pretu i Azul”;
- Salinas d PL - Banhu medisinal (te gora entrada pa nasionais d borla);
- Terra Boa - Refeisãu friu i fotu d paizaja kareka;
- Rigona - Bonhu d Tanga d Tersera Jerason;
- “Nos Pinba” / Palmera – Refeisãu Kent (Aroz d Marisku);
- Kalheta Funda - Banhu d mar;
- Algudueiru - Banhu d mar.

Na nos perkursu no observa:
Litural xeiu d lixu sen soluson;
Kontrusons turistiku a menus d 200 m d mar (disrespetu pa lei);
Kaminhus obstruidu (vedasãus) ki leba-nu a altera perkusu;
Skursionistas (Stranjerus i Djasalenzis);
Kafanhot ta kme pedra na Terra-Boa;
Funks d Tartarugeirus (Kasadors d Tartaruga);
Tubarons d Parda na mangatxada;
Posas d agu d txuba (Pis-sinas) pa dzova d muskitu;
Izistensia d un “Biologu” spesialista na tubaron.

EU, EUA i NATO, sen aval di ONU, finansia es kanpanha di luta kontra “Kau mau”, na valor di 34 000 Euru.

Konkluzãu:
1- Falta d Pulitika Anbiental;
2- Pulitikus duenti, Povu dretu i ku saud;
3- Kau ka sta tan mau sima sta ta pintod.


Otel Belorizonte, 04 d Agost d 2008


Riporter sen kartera!

Olisanto

NA DJADSAL KADA GOTA UN VOTU

(Nutisias d Rua d “Toi Pedru”)

Ultimamenti, rua di “Toi Pedru” e palku di grandis spetakulu pulitiku, di Sidadania i rilijiozu, kuzinhod na lenha.

1- “UPUZISÃU SONBRA”: MARXA! MARXA!

Stadu Maior di “Upuzisãu Sonbra”, xifiadu pa se turnadu lider, sinhor Jota Es, inspirod na ofensiva Rus na Djodja, disluka pa Republika Independentista d Djadsal pa un boka-boka ku ileiturnadus d “Baixada Fulminens” pa ilektriza pa un luta korpu-korpu na kaza par(a)lamentu – kanpu di bataldja bipularizadu. Es fika muradu nun utel di “4 Vintuinha”, na Sidadi di Santa Maria (boka d kanpanha!), ta kume i bibe “Made In Eur”, lonji di odjus famintu di nos irmons “pirogeiru” (fujitivus di barbaridadi di ses pais) prizionadus ku umanidadi na kuartel militar di Protesãu Sivil.

Na kosta, “Situason” manda se kabu Monrovia, ki dizinbarka sikretamenti na AIAC, sen nha kunhesimentu, pa disminaja di kaminhu. Primeru, es kunsentra ses forsas i meius na “Vilage” kandidatu a sidadi d Santa Maria. A sigir, Jeneral di 10 Strela, proZador i pueta Joma Jiada i kumitiva (Ofisiais di altu patenti) lansa un kontra-atak rilanpagu atraves di diklamason di se poema di 400000 versus: Drenajen i Tratamentu di Agu Rizidual i inda Prumesas di Otus Projet. Es Arma d Remesu, Salensis i Djadsalensis ta amortiza-l djuntu di Israel duranti 400 anu.

Sal sta ta turna palku di diverson des dos tubaron azul - manipuladoris i kasadoris di votu.

2- SIDADANIA

Deus ten ki akonpanho-n pa libro-n d tud kuant e mal nes krizi finanseru di kapitalismu i inpirialismu ki sinhor “kumentarista” di tevek i difensor des sistema, Kazimiru da Pena, dja preveba.

UNICV sta konside bolsa pa risiklaja di lisensiadus forsadu! Te la, N ta rikumenda leitura obrigatoriu di jurnais papel “A Nação” i “A Semana” - dois Instituisãu d furmasãu pa sidadania!

Nes mudansa brusku di situason, spirandu kau mau, na simeira virtual d “Biblioteka” NATELIZA, pa trasa soluson pa saida di krizi finanseru glubal di kapitalismu/inperialismu, N ritoma nhas leitura di “Marx”, “Engels”, “Lenin”, “Fidel”, “Che” i “Cabral”, supervizionod pa “FERNANDINHO”, di Sr. Sabino Évora. Évora e un Skritor, Pueta i Studiozu di Storia d Sal, lisensiadu na Uni di Povu. Na se stud, el dividi pupulasãu d Sal na dois grupu: “Salensis” (pa fidjs d Sal - nativus), i “Djadsalensis” (pa imigrantis). Pur izenplu: nha fidja Eli Kreu e Salens pamo el nase na Sal; nha fidja Natiza, nasedu na Bubista, e “Djadsalens”.

3- IGREJA D NAZARENU

Pa muda d asuntu fastentu, IGREJA D NAZARENU, desd dia 5, sta na Festa di se 100 Anu inplantod na Kabu Verd. Inserramentu sta previstu pa 26, na Sine-Teatru d ASA. Pastor Luis ti ta prumite un grand kultu d purifikasãu d alma (na antigamentu i na mudernidadi) ku prizensa di otus pastor. Tud jent sta kunvidod pa partisipa nes kult pa liberta d puluisãu pulitiku.

Na dumingu pasadu (12), d plumanhan, akunpanhadu d nha neta Su, N tma part na “Skola Dominikal”. D not, un bunitu/kupiozu kult ku lus di Patromax, nun kontrast entr nob i bedju. Diaza N ka tenba udjod kaza txeu. Jent te na patiu!

No ba tud pa altar, no ba pdi Kristu pa nos salvasãu! Deus ten k spia pa nos - “Salensis i Djadsalensis”!


Spargus, Rua d “Toi Pedru”, 14 d Outubr d 2008.

Antonio Santiago Oliveira - Olisanto
CapAM(Ref)00016175
Tel:(238)2411827;Mov:9937349
Email:mailto:oliversan3@hotmail.com

TXUBA AMIGU

Txuba amigu sta manda mantenha! Txuba tira burgonha, ku murabeza, el bija Djisal di ponta-ponta, oji dia 22 di Juldju. Sen “Soluson”, agu fraudulentamenti kore pa mar, ”Terra Boa” tra txapeu! Salenz pregunta si ka era midjor bensoaba otus ildja, sima Santiagu, Fogu, Sanikulau i Santanton, ondi inda rezistentis kanpazinu ta rakatxa/ragasa kalsa pa baza inxada na txon mudjod pa simia sapatinha, kongu, fijon, midju i tudu otu ingron ki ta pari txeu! Turistas (txuba di Sal) fka prezu na utel, djangutud (nen kabra na brok (buraku) di rotxinha) ta sprita tenpu ivapura pa-s sigi pa luta/skurson/diskuberta di alguns marabildja di Sal: Monte Leão, Funtona, Rigona, Burakona, Monte Leste, Salinas, Fiura, Monte Grande, Djeu d Robu d Junku, Serra Negra, Rotxa d Radar, Rifes d Parda, etc. Muturistas di Taksi, Hias, Pikapi i Kuaster (tanbe sen nada pa faze) antisipa grevi di kaminhonistas di “Praia ten Soluson”: es dixa karus ta laba na txuba pa dpos Iletra manda fatura! Mi ku nha txapeu di txuba (ki pur azar N inkuntra na EKONOMATU) pa riba i pa baxu ta konta kantu gota kei pa minutu ki pa dipos N ba binde spekulod na Ministeru di “Aroz Malondr”. Na “Baixada Fulminenz”, Protesau Sivil foi txumadu pa sakurre populason di ba na rubera. Inda ben kes utxa alguns tenda na tropa pa aluja kriansas, bedjus i amdjers! Kandad limarias ba na txeia. Sorti des ildja-mudelu na dizinvolvimentu di turismu i kandidatu en da 2 sidadi te 2012 - Promesa di JF! Bon, manhan, si txuba falta, N pode prepara nha txapeu di sol (sunbrinha) pa infrinta kel sol (kaskod) di ratxa/mata ki pa N “diskura” na ladu di turistas ta brunzia! Pa anu 10 di ALUPEC i 33 di Indipendensia, midjor prenda pa Kabu Verdi/Seku seria bon txubada na txon! Inda ben ki nha xef(i) ka ta intende skrita na kriol, sinau N taba frit(u)-Dizubriga ku kauza justu! Klaru, armod en muralista, pasa dia ta kunpensa baxu salar(iu) na skribe kronika pa jurnal! Boka kalod, si Mariu di Sindikatu diskubri, el ta dixa di difende trabadjador! Otel Novorizont, Santa Maria, Sal, 22 di Julhu di 2008 Un kabrer kanpazinu! Antoniu Santiagu Oliveira - Olisanto(u) CapAM(Ref)00016175 Tel:(238)2411827;Mov:9937349 Email:oliversan3@hotmail.com

FESTA DI FINALISTA

FESTA DI FINALISTAS
(Anu/On 10 di ALUPEC)


N sa ta ben skribe di kuzas pikinoti, ma ki ta marka sis personaji pa tudu vida, ki Komunikason Sosial di Stadu ka ta odja - FESTA DI FINALISTAS di Jardin Infantil di OMCV-Sal (lokalizod na Rua 3 d Mors/Marsu, Boavista-Djisal), rializod na dia 18 di Juldj pasod, ku tema “Nos Kultura i Nos Tradison”.

Jardin Infantil di OMCV-Sal inisia Anu Letivu 2007/2008 ku 85 alunus, distribuidu pa 3 (tres) sala: 1 di Pre-Skular y 2 Infantil. Aulas foi sabiamenti ministradu pa 4 (kuatru/kuat) Orientadora i kuordenod pa 1 (un) Kuordenadora Pre-Skular, dzignod pa Delegada Skular.

31 (numeru sinboliku) d sis kriansinhas tranzita pa EBI.

Na programa pa rializasau des iventu taba konsta, entri otus kuza:
-Storia
-Dansas tradisional
-Dramatizasau
-Diklamason di puezia
-Kolokason di fita i Sesau di fotografia
-Lonx/lanxu ku pais i inkarrigods d idukasau y konvidods/amigus

Pratas/oris di kaza (Profisors i Alunus) ki izekuta tudu es prugrama.


Jardin Infantil OMCV-Sal, un opsau pa bu fidj !


Djisal, 14 d Juldj d 2008


Olisanto
(RIPORTER SEN KARTERA)

KARTABERTU II PA SR. PKM-SAL

Snhor Prezident d' Kamara Munisipal de Sal

P/K: Snhors Prezident d Asenbleia Munisipal d Sal
Diputadus d Asenbleia Munisipal d Sal
Munisips Salenz
Negrus, Mestis, Mulatus i Paskualitus

DJA Sal, 17 d Junhu d 2008

ASUNT: Kartaberta na Lingua Maternu -Variant d Bubista

Sr. Prezident d tud Salenz, te pa mi k vuta Skapa!

Pamo trabodj, txeu distansia i sirkunstansias (fora azar!), N falta buse inpusament, realizod sesta-fera, 13 d Junh, na Sinetiatru d ASA, na Spargus.

Tud “Rasa d Marilili” d Djasal faze kestau parse, pa dpos kunta kun favorzinh d buse part.

“Faveladus”, na kuntinuidad d kanpanha, pruveita festa pa labanta mas uns barrakinha na Olt d Sok, pa mas tard ser gratifikod kun ekonomikament d lux na “Baixada Fulminenz”.

Sr. Prezident kolaborant i (in)dependent!

Sima Pakalin taba flo-m: ”Plumanha e k ta fazid dia!” Pa ponta pe d saída nada amdjor k es prekatoria, d un Salenz d kandad on na Djasal, k tanbe sta ba pa prinsipais orgon d kumunikasau skrit d Kab Verd.

Sr. Prezident dialogant i transparent!

Saud, forsa i kuraja pa turo-m durant es kuat on. Na tropa kond es kansa, pa-s udja livr, es ranjo-m un reforminha vitalisia.

“Junt pa Sal”, na kontinuidad k mas liberdad i mas partisipasau d sosiedad sivil, N ta spira mas kunprensau i solideriedad.

Na kanpanha, nha kartaberta fka juntod ma kes panflet k Sr. Prokurador d Komarka d Sal dibe investiga pa Salenz fka ta sabe unde k sta verdad. Deus ta ajda k es k ta fka na oga d kason, moda kes Inkert Adoc(adus) d AN, fet k dnher d pov.

Sr. Prezident d unestidad i umildad!

Buse ta skulpo-m ka ter dod 100 Dia d Grasa, d prax. E k N ubi gmo buse taba pa faze un viaja dmurod pa stranjer. I kom inda N ta linbrod d kel brinkadera k liba buse ba respund opuzisau, sen asau na radia, N utxa amdjor skribe buse agora pa kuluka nhas priokupason i ten kabiment na PLATAFORMA ILEITURAL sufragod na urna dia 18 d Moi pasod. Buse kom marinher bedj i spirient ka ta stranho-m - buse e k fla mo na Djasal ka tinha kabesa prezidensiavel!

Sr. Prezident d responsabilid i dignidad!

Prumesa e divda!

Kom jurnal ka e d meu, N ta pasa ta nunbra(inumra) nhas prublema k N ta spira k ka ta ftxod na gabeta ta blura, sima nhas dos pdid d txon, k sen dspax o-m ta ser asedio-d ku furtuna d tentason!

SOLUSONS PA PRIOKUPASONS DUN SALENZ ATENT!

1) Restitui Forsa Aerea (FA) se identidad - tra-l kel plaka d frent k ta sklui-l d Sporg;

2) Asfaltajen i iluminasau d akel bukadinh d strada bedj k ta desvia pa Kuartel - prumesa;

3) Iluminasau d Konp d Footsal i relva pa Konp Futebol d 11 (onz) na Kuartel - prumesa;

4) Kuat pau d lus pa iluminasau d Bairru d Forsa Aerea (BFA) - o Favela, sima algen d Kanbra txema-l;

5) Na kel Prugrama d Luta Kontra Pubreza, k Sr. JMV po buses na mon, linbra d faze 2 (dos) fosa pa fidjs d Deus d BFA. Kel red d sgot bedj k Tuga txa, murre diaza;

6) Trabodj pa nhas 2 (dos) fidja (furmod na Anbient i na Idukasau) k na Guvern d JMN inda ka sinti sabura k ten un gota d oga na rost;

7) Flod fla ma buse sta pinsa ranka BFA pa ba planta-l nun lokal ki ka e konxid. Dzej antig d alguns magnata influent d Djasal. Un kunsedj: So ka faze moda Kanbra d PAICV, na psoa d Sr. Pimenta nen ka mite EMFA nes nigos. Nha subrinh Djika o Dotor Juzefa pude infurma buse gmi e “Malageta”. ”Koza jot e ken ki ka sabe le nen skribe”. N ta kata mariod alguns koza na ALUPEC k ta do-m pa kuntrata dos advugod amig pa reprezinto-m!

8) Pa ben d Djasal i tud Salenz, buse ma Guvern dive intende na partidja d ZDTI. Ki tal s buses ranja un rezerva pa prezerva/purifika rasa pobr?

Sr. Prezident d transparensia i ”fidj boa mai”!

En troka, N ta kunpremite (mi e om d palavra) kuntinua ta riga kel kanter k ta fka tras d purton d nha kaza. Un mon ta laba kel ot!

Saudasons Kabuverdianu!

Antoniu Santiagu Oliveira, un konbatent anonimu di Indipendensia!
Oliversan3@hotmail.com

NA LINGUA DI TERA

NA LINGUA DI TERRA

Nha ubjetiv(u) ka e kumenta ileisau autartiku, mas, sin, junta ma alguns intuziasta (Marsianu, Montrond, Gu, Tixa, Piduka, Ambrizth, Joven, Alves, Magi, Sesiliu...) na Kab Verd y na Merka pa divulga lingua kab(u)verdianu skrit(u).

“Kel Futur(u) e oj!” (slogan da inspirasau inprezarial) foi suplantod pa “Junt(u) pa Sal ma bu vot(u)” d GIMS, na ileisau d 18 d Moi d 2008. “Kel Futur(u) e oj!” (intendid(u) pa txeu jent na sentid(u) d prezent pasod i futur(u)) perde kunboiu nes autartikas.

Paicv, na presa pa dzaluja gims d puler na Sal, sen sta preparod, na ultimu ora, lansa skapa y un ekipa joven i d`lux, sen kunxe terren(u), nun aventura ingloria - strangeres na sis terra! Si futur fos pa manha, talbes, rezultod(u) taba ser ot. Derrota mut pizod pa ond’amarel!...

Gims, sima algen fla la pa kapital, faze tud(u) pa ganha es ileison.Un ot li pa Sal tb fla: dja sta bon d konpra votus. Pa es dois ilustres, sinserament: simiter ta k txeu bons intenson. Un dzafiu lansod a PN y PJ pa prosimu batalha ileitural.

Ileisau “livre, just y transparent” masturbod ku panfletus, insultus, provokasons, difamasons, suspeisons. Te bod(badu) pa Brazil faze makunba. Xuva(txuba) d kartas ta pdi ajuda d tud(u) tip(u). S(i)ment(u), blok(u), dinher pa paga lus ma renda d kaza y pa konsulta fora.Te BI na venda. Paxenxa a nha gent!

Asin e dimokrasia - puder na rua,...! Dpos, kada un ba deskaska si banana. Laranja so pa nos pok(u) y limitada.

K tud es presau, povu vota k konsiensia!? Sal ganha!? N ka sabe. N ta spira k paicv ta faze un opuzisau konstrutiv(u), inerjiku i permanent pa liba JF y Gims kunpri koza ki es promite. Plataforma sen kunpromis.

Parabens pa gims k surprende-m! Bon trabodje i k si es ten d ganho-m ot bes, pa es kunvense-m. Kom(u) rekonhesiment(u), na nha albun autartiku Gims ta fika gravod(u).

Kom(u) integrant d GAS (Grupu d Apoiu a skapa) i kunpanher d trinxera d skapa en 1974, N da nha kontribut dezinteresod nes luta dezigual. Gims pasa kuat(ru) on na puler, prepara i ben pa es dia i si lider prinde lisau nun destakod d mpd - Djo Pint(u) d bubista.

Paicv, ftxod nun grup(u) d elite salense, ten k abri pa-l reenkontra ma sis militantes, sinpatizantes y amigus. Kes storiku (pereirona, kuxin, skapa, olisantu) dive da sis aroz k atun i dixa jovens (nos fidjes) tma lem des bark(u)/kunboi amarel.

Po N rekupera inerjia des derrota N dsidi ba pasa uns dia di feria meresid nun di kes Otel d lux d sal, ta kme so alga, agradse nha amig(u) djo pint(u) y si ikipa d sont(kabrer) d kaza.

Na sal sont d kaza rejeitod. Kauzas e txeu. So tres pa ka tma jurnal mut spos: Fort inplantasau d JF; Inkapasidad d paicv; Skapa (stranger na si tera) ka tev tenp d faze si imajen.

Un obrigad(u) a skapa. Sal y kab(u) verd sta konta gbo! N fka kontent d ter udjod nanda y elder dbu lod. Pa Paicv: favor aprosima d pov(u). Pa MpD: pa ka iludi k es vitoria. Pa Ucid, vensidor d ileisau na sausent, nhas parabens i forsa!
Un konbatent anonimu d skerda mudernu!

Antoniu Santiagu Oliveira - Olisanto(u)
CapAM(Ref)00016175
“Forsa Aerea” Sporg Sal
CP 63
Tel:(238)2411827;Mov:9937349
Email:oliversan3@hotmail.com

Obs:ES asunt sta na jurnal A Nação/Nasau d oj

NA LINGA KABUVERDIANU

Lingua di Bersu, Nãu Ofisial, uniku pa tud Kabuverdianu, na Pais i na Diaspora, papiod/falod en 9 (nov) variant diferent, kunsuant ilha. Na Rejiãu Nort, no ta fala na variant d Barlavent (Bubista, Djasal, Saniklau, Sonsent i Santanton) i, na Rejiãu Sul, no ta papia na variant d Sotaventu (Brava, Djarfogu, Santiagu i Moi). Ki grandi rikeza!

Na variant d Bubista i Santiagu, misturod ku Djasal, Sanvisent i Patxiparloa, muntod na jurnal papel “A Nação”, N spadja ALUPEC (Alfabetu Unifikadu pa Skrita d Kabuverdianu) pa tud(u) kutelu ki ta mora Kabuverdianu.

Na Dezenbru prosimu, pa kumemora 10 (Des) on d ALUPEC, organizod pa Ministeriu d Kultura, un grupu d Sientistas di Lingua Maternu, ta reuni pa buska manera di liba ALUPEC a kunpri se distinason trasod pa Dekretu-Lei nº 67/98, d 31 d Dezenbru d 1998, inda na Guvernu Ventuinha, kuandu Ministru d Kultuta (MK), era Sr. António Delgado, pesoa k dxa sodad enkuantu Ministru d Kultura. Sr. MK, Manuel Veiga, pamodi bose dxa ALUPEC panha un pneumunia di 10 anu tudu na “Bonh-Maria”, na barba d Fotokupiadors i Violadors d leis PDM i d Grupu di Padronizason d Alfabetu Kabuverdianu?! Ka ta fazedu!

Sr. Guvernu d “Bon Guvernason” i Srs. Diputadu di Situason/Opozison, ka bzot skese mo “Povu e moda toru” - pa dfeza d se Identidad d Kabuverdianu (Atlantiku i Makaroneziu), el pude spadja/distribui txifri na 2011. Inda bola sta na nhos mon! Komu intuziasta ferrenhu d ALUPEC i pa angustia di sauduzistas di “Kamonx” i di kontinuadors d Alfabetu tuga na lingua kabuverdianu, N ta utxa amedjor pa ken di direitu ka skese kunsedju des amig “Ptod Aga” na lusides d se luxuria!

N sta spiransod mo des bes, ku apoiu di Grupu di Padronizason d Alfabetu Kabuverdianu, na Kungres d Dezenbru, ta sai un ultimatu pa ubriga Guvernu Tanbarina a kunpri prumesa d kasament d votu, pa aligria di nos fidjus i netus, nes anu ilektivu.

Senhors “Pexe-Spinh”, Sauduzista, Kontinuador i tud kes otu anti-alupec sta kunvidod a partisipa nes Ivent di Lingua, pa resibe regras d tratamentu, kunservasãu, aprezentasãu i komersializasãu d Kabala Pretu na Merkadu d “Boavista” na Sidad Kapital d Djasal. Sta spresament pruibidu venda di Pexi na Rua d “Toi Pedru”! Inda sta spresament pruibidu venda, na kaxa di karrinha (inkluindu sedusãu d freges ku buzinãu), d oli kabala friskinh d Tarrafal d Saniklau.

Pa nhos kunhesimentu: merkod d “Fund d Alvarina” e pa binde “Alfasinha”; i merkadu di “Boavista” e pa benda di pexi: Kriol (Kabverdian i Giniens), Purtuges, Olof, Spanhol, Franses, Ingles, Italion, Ruse, Papiamentu i tud kes otu.

I pa ken ki ka ten Net (luxuria di Rikus di Dimokrasia i Funsionarius Altu d Stod) ten ki kuntenta ku “Maninha” (“A Nação”) pa divura “Olisanto”, “Agnelo A. Montrond”, “Marsianu nha Ida padri Nikulau Ferera” o “José António Lopes”, semanalment, a troku d 1 Euru. Adeus skudu!

Nota 10 pa es jurnal d papel, budona na kunprimentu di se promesa - divulgason di ALUPEC!


Djasal, Pos Verd, 23 d Setenbru d 2008.

Olisantu Djasalens (BI-00016175)