AKROBASIA DI DISKRIMINASON
Na plenu KRIZI Ekonomiku i Finanseru Internasional, ASA da lux di brinda populason di Kabu Verdi (Mindelu, Sal i Praia) k un show di AKROBASIA DI DISKRIMINASON na dia 18 i 19 d Abril d 2009, sen referendu na Baixada Fulminenz na Djidsal i Bila Nobu di Gaia na Bubista (dois Sidadi Mudelu di Barrakas na Dizenvolvimentu) pa kumemora 25 on d izistensia des inpreza d Aeroportus i Siguransa Aeriu, ku filuzufia di k "NEN TUD DNHER TA BA PA JULBERA/BOLSU". Ta bon d sbanjamentu i d Diskriminason!
Sentenas d salens i djidsalens di tudu idadi, klas i nason, sen spia na kustu nen na risk d ser asaltod ses kazas, parse na praia d Santa Maria pa asisti es show di Breitling Jet Team (BJT). Ots tont, abituod na ka kunpri urariu, fka na Spargus ta xpa mel d pontualidad Britaniku. Mi, Carlos d Bitinha i Skuta (senpri fieis a nos "Boka-Boka" d Rua di "Toi Pedro") no fka na Sparg, onde no da d kara k spiaun d Liberal.
Deus ta kre k (dpos des fumarada d puluisaun na seu des tres "Midjor Rabentola" di "Mundu Nobu") spektru di krizi ta fujinta, MAZELA ta fluri na "NOBU MUNDU" di skritura sagrod, pa SALTIADORS di fruta made in Kriolidadi dxa d bate na porta d "Guvernu d Bon Guvernason" ta pdi SUBSIDIU pa rasgata liberalismu d selvajaria d morabeza.
Inkunfurmod kes nobu rejionalizasaun di "fatiota Dnher Publiku", N ta pregunta sr. Prezident d Konselhu d Administrasaun d ASA pamo e k Bubista (putensia emerjent sen sintoma d kriz, kanpiaun d "turismu di kruzeru", k se Aeroport Internasional d RABIL - "RABENTALA" = grand kontribuint pa OGE i pa Repartisaun d Finansas d Sal, trabes d rejist predial) fka d fora nes Patrulha d Akrobasia? Independentimenti d motivu, foi un grandi injustisa sklui Bubista des mangatxada Breitling Jet Team. I, komu un kabrer ragasod, N ta oferese 5 vez mas pa intrigo-m koxa / kabesa d ASA, po N vinga es mal kauzod a ilha d Dunas i a Djo Pinto. Da Bubista kel ki e disel, sr. Prezident!
Snhors DIPUTADUS di nason (reprezentantis di RIKUS, remidiadus i pobris), na nomi di tudu "SEN TETU" i "Sentatet", N ta pidi-nhos pa, unanimemente i sen dimagojia, vota un Deklarason Universal di Imerjensia pa saida d Krizi, ku sigintis obrigason:
1- Konjila tud kumemurasons, festivais, salarius i ajudas di kust di diputadus, pulitikus, guvernants nasional i lukal, asesors, diretors, i etc.;
2- Kunfiska tud terrenus d tubarons (bronk i pretu) na ZDTI k sta ta sturra na sol i vinde-s pa ken k kre mite trabodj;
3- Limita pasiata pa stranjer d Srs. Prezident d Kanbra;
4- Inpriga popansas i reseitas des mididas na kunstrusaun d kazas sosial, kunbat kontra thugs, kasubodi, siguransa i inda na prugrama di luta kontra pubreza na Bubista, Djidsal i Sonsent.
Pa tudu kes ki ta pensa diferent d min, nhas diskulpa pa nha radikalismu ki inda pode libo-m pa GUANTANAMO - prizaun internasional d Dimokrasia i d Diteitus Umanu - pa un kursu akrubatiku d Obamanizasaun i di "Bon Guvernason"!
21/04/2008
Olisanto - http://olisanto3-natelisa.blogspot.com/
