Durant 2h00 (19h00-22h00), perant serka d 300 expetador (d 0-100 on), Talents d Prufsor, kunpanhod pa kunjunt muzikal “SALINERS d EDUKASAUN”, anima psoal ku Tiatru i Kantigas (Morna, Kuladera i Kola San Jon). Grand xou d es talentozs kunbatents d sidadania!
Jardin d OMCV abri atu ku Tiatr (“Viulensa Domestiku”). A sigir, munitoras d Jardin d “Ka Nhu Padr”, ku traji tradisional, finka na Dansa. Grup Koral d Prufsors ku “Skaderod” da abertura pa un sikuensia d Vos Famininu (Morna, Kuladera i Kola San Jon) dibaxu di txeu aplauzu (palma).
Pa fitxa spetakulu, Grupu Koral, formadu pa profisor di tudu subsistema di insinu, sobr fort aplauzu di publiku, subi palku pa un abrasu fraternu di Delegada na Konselhu d Sal!
Na fin d spetaklu, un kunvit pa Misa d Asaun d Grasa pa Prufsor, 17 d Abril pa 17h, na Greja d Sidad d Sparg. Kada partisipant diveba liba 1 kg d artigu ki ka ta straga pa Parokia distribui pisoas nesisitadu.
Sirimonia d Inserament d Festa d Prufsor ta previst pa 23 d es mes, ku un jantar d gala na Utel Kriola na Sidadi di Santa Maria.
Parabens Prufsor d Djadsal pa mas es Xou Kultural.
Na Lingua Maternu, kada gota ta kunta!
Forsaerea, 19 d Abril d 2011
Antoniu Santiagu Oliveira - Olisantu
Publikadu na asmana, 240411: http://www.asemana.publ.cv/spip.php?article63404&ak=1#ancre_comm
