SEN DJOBI PALADU-KAUBERDI TEN SOLUSON

DISKURSU DI VENTOMANIA-SEN DJOBE PA LADU
“KAUBERDI TEN SOLUSON”

EMPEDE-BCV di sr.soluson, Uris Korrida y Selva,  e tudu menus amigu di Sonsenti,  e di Barlaventu.  E un rejionalismu multigatizadu y badiuzadu. Mira los visius di partidarizason di 91: Uris-BCV, Felizis-BCV, Oskaris-BCV, FTavaris-BCV, Letiris Fidju -BCV (tudu badiu di “diaspraia”), y JaLéis, pa tapa Onbertu Kardoris Diaspraia boka. Inda pa konpleta DISKRIMINASON, na kabesa di lista pa disputadu pa Sonsenti, no teni un patxiparloa, sr.divulgadu Jogomis!

Si djobedu pa LADU, kes otu ENBAXADA di stadu ta kontaminadu di rabentolas ventomania, rekrutadu sen konkursu politi-ku/publi-ku, pa kor di kamizola ventomania. Pur kauza d es ilutrus midjors fidju  ventonhia, BCV y ots burka staduais, sta inpedidu di rekruta jonvens kualifikadu, dispostu a TRO BOIA sen dexa poder subi kabesa. Ironikamenti, mersenarius politiku di BANDERA (SKERDU,DIREITU/SENTRU) ta kontinua manenti ta progredi na korreria na ses enbaxada di orijen. Burkas Munisipais, Konsadus di partidarison!

Sr. Soluson, Sonsenti sa ta ba na dois mandatu lejislativu, sen un kabesa di lista jenuinu. Empede ten binde ta sokorre di migranti (Sintanton/Sanikulau), pa representa-l na paralamentu di republika di banana. Mindilensi di raizi, e presizu dizé un BASTA, pa na prosimu TENPORRADA LEITORAL, ka indikadu un badiu di ”diaspraia”( vokabulu enprestadu na nh’amigu Abertu, novu reforsu di Usidimania pa lejislativu) .

Desdi 91 intrintxeradu na puler militantus, ora na (en)baxada ora na konsomadu, SEN DJOBE PA LADU, komu e ki N podé kredida nes kantiga rabentolizadu di kanpanha. Sabedu mo na kauberdi, politika e un gradi negosiu, un instrumentu di enrikesimentu rapidu! Mesmu asi, Nhu ba tevekaria di reputa kun fodja di papelinpinhu ta tenta engana eleitornadu, ki nho staba ta dexa konsoladu di kapital di repúblika di bananera mas POBRINHU, y ki nho staba ku difikuldadi na manti fidju na skola la stranjeru na midjor universidadi di mundu. Povu xinti pena, e desidi da nho vitoria na eleison di 20 di marsu. Sen spia pa BANDA, Ago e Uris Korrida y Selva! Kexa dja kaba, go Nhu e rei di repúblika di bananera y di tudu kabverdiana y kaverdianu. Donu di 40 disputadu pa manda y dismanda na paralamentu di multigatu! Di tantu kontentamentu y satisfason di es SALTU-MORTAL, Nhu sa ta faze FESTA VENTOMANIA na diversidadi linguistiku di nason global, pa tudu konsuladu-rejion, kontradizendu ku slongon di kanpanha - TRA BOI, TRO BOI, TRA BADJU, TRA BODJE, etc.

Na festansa di rua di Lisboa, na linga di “PAO & FONEMA”, digu, pon y fo(me)nema, na nha pátria y sidadi di utopia-Mindelu, Nhu reforsa SLOGONS Y PROMESAS di kanpanha- AGO E URIS -SONSENTI KRE SOLUSON. Y pa skusedi, midjor e apunta alguns di es:

1-SLONGON:

-15 E DI MAIS
-NHA PARTIDU E KAUBERDI
-SONSENTI KRE TRABADJU Y SIGURANSA
-SONSENTI KRE AUTONOMIA (REJONALIZASON?!)

2-PROMESAS:

-45000 enpregu (5000/repúblika) duranti mandatu, 1000 pa anu.
-Reduson di IUP, IVA i Batista
-Atrason di investimentu
-Renegosiason di akordu di peska ku UE
-Afetason di fundu di anbienti a munisipius
-Txapamentu/reabilitason di kasa (Substituison di Kasa Para Todus)- palasiu di lata
-Governason pa tudu kauberdianu, toleranti, transparenti , sen diskriminason
-Rendimentu minimu garantidu (RMG)
-Izenson di inpostu pa MPE
-Estatus di PJ, Politikus, PMS,AP, Etc.
-Konstruson/rebilitason di aeroport y portu ( Brava,Fogu, Sintanton, Sonsenti , Santa Luzia,y etc.)
-50 bolsa di studu pa midjor uversidadi di mundu
-Kresimentu di ekonomia pa 7%
-Ka dexa poder subi kabesa
-Sirkular di Fogu, Bubista, etc.
-Konstruson di Txan das Kaldera na Fogu
-Siguransa zeru na kapital di krimanilidadi
-Mon duru kontra korrupson, krimi organizadu, etc.
-Dispartidarizon di FP (empede/paiceve)
-Edukason y saudi gratuiti
-Etc, etc, etc.

Tudu isu nes mandadu. Si asin for, Nhu pode konta komigu na prosimu lejislativu. Des bes nha votu abstenson, kontra sistema politiku kauberdianu.

Pa konklui, Sr. Soluson, sen bolsa di stadu nen djobedu pa banda, nhas fidja studa la stranjeru, ma ningen ka udjo-m na tevekaria ta kulpa “pobreza”. Da fidjus skola e diver di tudu pai/mai, prumeru,  y dipos stadu di kabu verdi. N xinti envargonhadu odja un kandidatu a PM di repúblika di bananera na tevekaria berdianu, ta txora mas uns SIFRON pa manti fidju na midjor universidadi di mundu la stranjeru. Logu nho ki nasé na bersu di fofja di bananera, triste go!!!

Sr. Soluson, pergunta, Zmania-Moranginhu di Amor a Terra, kantu N ta kusta. “Pur amor a terra/Kauberdi na solunson”, N ka ta brinka na serbisu!

P'es prekatoria na ventomania, N meresi premiu di bolsa di meritu la stranjeru na midjor universidadi di mundu!

JHA, si nha bista saia di mudjer, xaile na sintura y lensu branku na kabesa, pode konta ku mi na vijilia di repúblika di bananera ten soluson. DJuntu, nos e mas forti!!!

Txan di Marinha, Kaza Para Todus-Blok L, 05 di Abril di 2016 – ONE ZERU, KAB VERD TEN SOLUSAUN!

Olisanto Nateliza-Konbatenti di Liberdadi, Justisa y Paz!

Obs: Banco de Cabo Verde (BCV)