GERRA DE NATUREZA (TXUBA-MAR-SOL)

Xeia de ont, dia 24 de outubr de 2011, na se marxa ofensivu pa ukupasaun de Baia de Parda, pasond pa Pose Verd i pa Rebera de Parda, ba ta dixa algun baixa pa kaminh (posas de agua), pa Forsas de Retaguarda (Bunber de ASA i Protesaun Sivil de CMS) rekulhe i dpos ivakua-s pa Uspital de Sal da sintensa.

Misaun de pudera de Lagoa de Parda fui kunprid, ma ukupasaun de Baia de Parda , Ubjetiv Primer, ka atinjid, devid INJERENSA de “EIXU de MALl” ( Fransa Inglaterra i Merka), ke sen kunsentiment de ONU (Organizasaun de Nasons Unidu) i TPI ( Tribunal pa Indefezu) manda sis tropa (aero-naval) pa mas es Gerra de Natureza, ke supost misaun de ”PRUTEJE” sivil de investida de Txuba.

Inkapasitod de ronpe Linha de Frent de kunbat, Xeia tenta antra pa Flak Dereita sen susese. Anton, el fui ubrigod na pasa pa Defeza na Lagoa, pa guarda reforse de “Forsa Superior” , pa dpois prusegi ufensiva te ubjetiv final-Kapitulasaun de Baia de Parda.

Na primer Dekret-Marsial, Txeia ubriga Lagoa ( forsa vensid) runpe ke si “STATUT de NEUTALIDAD” , kupiod na Suisa, i pasa ta uza uniforme tip suvietik (kastonh terra), substituind asin si farda Azul Pord.

Mar, ka rada pe te ago de Prainha de Parda, pront ta spira futur asaun d Txuba. Nes paraja sen dia, el lansa un grand onda diplumatiku pa kunvinse ONU i TPI na pruva injerensa Sarkamerobama nes kunflit de seklus de natureza ( Txuba Mar Sol).

Terra, oportunista kome senpre, antes de Sol antra na asaun, dja ba ta tra pruveit (sulbe aga). Sort pa “Font de Kuntentor “ , na marja (berna) de arbera, ke des Txubada sta alimenta / furtelese ses veia des ben mut rare na Djadsal. Umesmu sorti ka ten abitantes de aldeia, ke mede de ladron fka sen sumia (simia). Udja ke pont no dja txega na nos terra!

Kome parte mas frok nes Luta de Natureza, abitantes de terra ( Djadsal) ta apela es forsas belijerante ( Txuba- Mar- Sol) pa txega nun kunsens, mas urjent pusivel, pa ivita un dezastre anbiental igual a krize finanser i ekonomiku mundial.

Forsaeria, 25 de outubre de 2011

Olisantu Nateliza

“Oh txuba, ben pa Kabu Verdi”!

Tont de klama pa TXUBA BEN KABU VERDI, na madruda de oji, 24 di otubru di 2011, txuba amiga (ingrata txeu bes!) traze mantenha pa povu di Djadsal. Tard pa agrikulrura, ma bon pa magrise es kalor di ratxa kosta i pa fujinta alguns duensa di pdm, moda Kunjuntiviti ( Dirrapenti, Lanbada, Face Book, Faxi Faxi, MI o Kasa pa nos tudu) fetu kasa na Sal, nes ultimu dois mes.

Kome un sitadinu kabrer, biradu kanpazinu na ortas di papai ( Baxon, Txan di Pasensa, Badanela, Lonba de Padre, Sgreta, Furrinh, Aga Dose , Pa Bedje, etc, etc) ki Patrimoniu di “Bon Guvernason” di MA FE nega-nu direitu di posi util, N labanta un poku mas tardi di kustumi, pa ba asisti Spetakulu di Txeia, na si kaminhada, na pasu baka, rumu a Parda, baxu melodia di “Ildo Lobo”. La Parda, mar taba sakedu ta spira-l pa un ”txabeta”. Pa inpidi si antrada, dias antis, el (mar) kunstrui un muru di areia. Asin , txeia , sen forsa, kaba pa fika ankadjod na lagoa di Parda, ki resibe-l di brasu abertu. Era 7h00, kond txeia, nasidu la Tera di Ningen, pasandu pa Posu Verdi pa kunprimenta, aterra triunfanti na Lagoa di Parda, baxu palmas di populason di aldeia.

Un bon txubada, ma insufisienti pa simia. Kes plantinha di Posu Verdi i di Rubera di Parda, ta kundanod na murre fugod, sima kantadu la Sonsent nha Patria amadu.

Oras depois, Sol , upurtunista i intrigista, pront pa antra na asaun di txupa-l (agu) gota gota, antes di solu sulbe-l (pa mata sede di alguns anu). Natureza na faze bale lei di mas forti! No ki ka dibe stranha, mo e asin ki ta funsiona nes kasa (mundu) di inspirason usidental. Tudu kusa diferenti e pa lansa “Brinkedu” (bonba) di Sterminu di Masa di NATO/OTAN, ku o sen aval di “ONU”. Na defeza des TERRORISMU di sarkamerobama ta TPI (tribunal pa indefezu), na julga i kundena “demokratas” Arabe/Musulmanu de Azia i Afrika.

É un pena udja grandi kantidadi di agu ta murre angulidu, na mansu mansu, na lagoa di Parda, separod di mar pa un barraja di areia. Sort pa Muskite, i Trabodje pa Jul di Uspital!

Si mar di Parda fui kapaz di kria si defeza (muru di areia) pa inimigu ka invadi-l si territoriu, Stadu di Kauberdi devia kunstrui dikus pa tudu rius di Sal, pa pruveita es mar di aga, ta djobe abrigu/barraka pa livia electra de baka di povu. Es furtuna ki Deus ten monopoliu di distribuison, ta merise un distinu diferenti i midjor pa sirbi pov de Ilhas prinsipalmenti nes krizi di agua i inerjia.

Olisantu Nateliza, na mas es “RADIKALISMU” di “ Diskursu di Ventu”!

Forsaeria,24out2011
OLISANTO NATELIZA