MOVIMENTU DI BOINA PRETU-FORSA BUBISTA!

ORDA D KUNBAT NUNBR 01/2010

Na nha digreson pa Europa (Fransa, Suisa, Ulanda i Purtugal), d Outubr d 2009 a Janer d 2010, pa kuntakta ku kabreras i kabrers Buavistenz, pa rekulha d subsidiu pa nha Plataforma Ileitural Autartiku d 2012, na mala diplumatiku, alen d Lingua Kabverdian, N liba Purtuges, Spanhol, Franses i Ingles pa sirbi-m d ferramenta d kumunikasaun. Spanha i Italia fka pa sgunda fazi di Maratona.

Na Paris, N munta nha Distakamentu Jeneral/Selula d Apoi-ligasaun ku tud Bek, Skina, Rua, Arbera, Txada i Konp d Eurapa Usidental, kurdenod pa Ek d Xav (Paris) i pa G.D.C. Bubista d Basel.

Tud kunbinod, mo uns 15 (kinz) dia ants d entrega d Lista d Kandidatura na Tribunal, Destakament pa Rejiaun d Europa ta patrusina Mandatariu i Kabesa d lista d Paicv i Mpd un parodia da kes bon na Europa, ku ubjetiv unik d liba-s a skse d manda prezinta Lista d Kandidatura na Tribunal na ora.

Na Bubista, nha Mandatariu ten indikasaun spres pa rapta Juiz i gents ligod a ileison, 15 minut ants d ora d ftxa Tribunal, pa nhas adversar diret ka antriga dukments d kandidatura na tenp permitid na lei. Tatika/armadilha uzod tenps pasod pa un determinod muviment salta puder na Bubista.

Dpois k N regresa d Europa, N disluka pa Bubista, Praia i Sonsent k Misaun d Rekunhesiment i kuntakta ku kabreras i kabres rezidents nes ilhas d akulhiment. Mais dias, talbes, la p`altura d San Jon, N ta faze pasiata pa Saninklau i Sintanton - ilhas furnesedor d mon-d-obra na Bubista. Desd antigament ta izisti un triangulason fort entr es 3 (tres) Nason d Rejiaun Nort (Bubista, Saninklau i Santanton).

Na Bubista, Praia i Sonsent, un tib un testa-testa k olts dirijent Tanbarina, Ventuinha i Laranjinha, unde k N tib ta splika-s razon d nha kandidatura Super-partidariu (paicv, mpd, ucid i etc.).

Na Praia i na Sonsent, N apruveita “Bodj d Kunjunt” pa N kasa-s. Inda na Praia, N tev un runiaun d trabodj ma nha kamarada d arma i amig Amadu Abailadu, Super Vereador pa Sguransa na Kanbra d “Sidad Sa Ta Muda”.

Muvimentu di Boina Pretu - Forsa Bubista, pruvizoriament, ten se Kuartel Jeneral na Sidad d Forsaerea d Republika d Djadsal, pa sguransa d se psoal dirijent na imigrason nes Republika vzinh, k nun tenp klor moda oj ta ba mata sudad.

Na Bubista, Kumand d Muviment sta finkod na Toskinha d nha Dalina. Na Praia, na Sukupira. I na Sanvisent, na Butkin d Basel, Madeiralzinh (sgund zona libertod d jug kulunial, Murada unde k N nase na 1953 - One Lus d Muviments d Libertason na Azia, Merka i Afrika).

Na porta d es lugars publik, sta prigod un Idital ta sulisita vuluntors pa integra lista kunsensual pa LIBERTA BUBISTA d pulitks autartik d Masonaria, Luzonaria, Patiodaria, Gungonaria, i d kunpads, fdjods, primajas, parentajas, amigajas.

S`bu ta interisod nes kauza nobre, apruveita es upurtunidad izenplar i unik, bu junta ma Muviment d Boina Pret - Forsa Bubista nes luta d Bubistenz (Kabreras/Kabrers, Mindelenz, Badiuenz, Salenz, Patxiparloenz, Djarfugenz, Purtugenz, Italhonenz, i ots Turistenz), jents trabadjador ki ka furta koza d ningen, i pa kaba k FESTANSAS d VARRIDORS d Kanbra MUDEL d K..., ki ta k dia kuntod.

Muviment d Boina Pret e moda PUTONA, basta burrifa pa’l kumsa ta bruta k forsa, pront pa drruba puder instituid ku ajuda fraudulent di Kumisaun d Muradors di Justisa Dimokratiku.

Un pdid d finansiament d kanpanha sa ta ser preparod pa un grand mestre d ikunumia nasiunal, daturod na Merka, pa N aprezenta na SDTIBVM. Ja N ten garantia dakes ex-mnistre i olt funsionar d bonk, dirijent ventuinha infiltrod na Susiedad kriod pa Guvern Paicv (izenpl invulgar d partidarizason partidariu d instituison). Sr. Prezidenti, pa’l garanti se regalod XARUT lonj d Bubista (Mogne/Pinhu), el skankaro-m porta d Susiedad pa N rusa alguns milhar d ektars d terren pa Fund Perdid d kanpanha.

SDTIBVM ta kuntinua ta da prova d kuperason dzinterisod, d sulidariedad, despartidarizason i d transparensa Nasional.

Amin, pa refursa es jest umanitariu (i kome N kre ser diferent d tud kanal(h)ista), N abri mon d nha furtuna fet d venda fraudulent d terren d Serafim Brito Oliveira, N trintxera-l na bankins, bankets i bankons d Bubista: Bankona, Bonk d Suma Port, Bonk d Korb, Bonk Marmiler, Bonk d Viena, Bonk etc., na noms d familiars afastod i amigs d peit.

Nha parenta, Fátima Fialho, ministra turista d “Bon Guvernason” d ZMNuvas, ka pude sabe d es BONBAtomiku d kanbalaxi.

Pa prekausaun/dfeza, N kunstitui un Adivugadu di Povu, kaluter dzOrda d Klas, murod na Sidadi Kapital di “Praia Sa Ta Muda”. Deos ta libro-n tanbe d Sr. PGR, pa’l ka manda kasa-l mandatu, pamo, snaun, N ta LIXOD na (in)Djustisa.

Pa vive Republika d Bubista! Pa vive MBP-FB! Vitoria e sert!

Na Lingua Kabuverdianu, kada gota ta kunta!

Republika d Djadsal, Forsaerea, 21 d Abril d 2010
Antoniu Santiagu Oliveira – Olisantu
(Konbatent anonimu d Liberdad d Patria)
oliversan3@hotmail.com
http://olisanto3-natelisa.blogspot.com
Tel.: 2411819; Movel: 9937349